اوشاقلیق گونلریمیز
نه ماراقلیایدی بایرام، او زامانلار کی بایرامی یالنیز قیرمیزی بویاقلی یومورتا ایله تانییاردیق. او زامانلار کی قیشین سون آیی باشلارکن هر چرشنبه داغ ـ داشا اوز قویوب کاکیل ییغاردیق، بلکه آخشام چاغی چرشنبه اودوموز، قونشولارین اودوندان اوجا یانسین. نه گؤزهل ایدی او گونلر کی داغ ـ داشی آیاقدان سالاردیق بیر «بئلبزهن»دن اؤتری. بو پروسهده چوخ اولاردی داشدان دوشوب، قول ـ قیچیمیز چارپیلسین. آمما نه بو چارپیلمالار، نه ده آتا ـ آنامیزین دئیینمهلری هئچ بیریسی ائده بیلمزدیر بیزی اؤز بیلدیییمیزدن قویا.
بیز بایرام چاغلاریندا اؤز یولوموزو گئدردیک. کاکیل ییغیب اود یاندیراردیق. «بئلبزهن» دهریب کیچیک گولدانلاردا اکردیک. چرشنبه گئجهسی قوهوم قونشونون ائولرینین باجاسیندان سو تؤکردیک. بایرام آخشامی هئیبه گؤتوروب، کند ائولرین بیرـ بیر دولانیب بایراملیق آلاردیق. گئجه چاغیدا آتا ـ آنامیزدا گیزلین بیر دولچا قولتوغوموزا ووروب داملاردان قورشاق ساللاردیق. بایرام گونلری دامدا گیردکان اویناردیق. هردن بیرده واخت ائلهسئییدیک اؤزوموزو بایرام سوفرهسینین باشینا یئتیریب، سئودییمیز شیرنیلردن گؤتوروب تازاشدان داما چیخاردیق. هئچ بیلمزیدیک بایرام گونلری نئجه قورتولوب مدرسهلر باشلاردی.
آمما ایندی نئجه؟! دونیا بیزی کیریدیب، بوتون شادلیقلاری الیمیزدن آلیب، یئرینه هؤیوشنه ایله غوصصا دولدوروب. گلین اؤز دبلریمیزی قورویاق. اؤز وارلیغیمیزی، کولتوروموزو هابئله ادبیاتیمیزی منیمسهییب، یایاق. گلین کئچمیش زامانلار کیمی ساده یاشایاق. نییهکی شنلیک، بیرلیک و دیریلیک یالنیز سادهلیک ده دیر.
یئنی ایل بایرامینیز قوتلو اولسون!
نئچه بئله بایراملار گؤروب، عؤمور بویو ساغلیقلا یاشایاسیز!
